وم آزادی پاکستان: بھارتی فوج نے پاکستانی فوج کو مٹھائیاں اور مبارکبادیاں پیش کیں

سری نگر/14 اگست/ یو این آئی

بھارتی فوج نے ہفتے کے روز لائن آف کنٹرول کے چلیانہ ٹیٹوال کراسنگ پوائنٹ پر پاکستانی فوجیوں کو ان کے یوم آزادی کے موقع پر مٹھائیاں پیش کیں۔
فوج نے اپنے ایک بیان میں کہا کہ چلیانہ ٹیٹوال کراسنگ پوائنٹ پر پاکستانی فوجیوں میں ان کے یوم آزادی کے موقع پر مٹھائیاں بانٹ کر نیک خواہشات کا اظہار کیا گیا۔
بیان میں کہا گیا کہ بھارت نے ایسا کر کے لائن آف کنٹرول پر امن و آشتی کو قائم رکھنے کے ارادے کا مظاہرہ کیا۔
فوج نے اپنے بیان میں کہا کہ بھارت نے ہمیشہ ایسے اقدام کر کے پاکستان کے ساتھ دوطرفہ تعلقات کو مضبوط و شیریں بنانے کی کوششیں کی ہیں تاکہ خطے میں قیام امن کو یقینی بنایا جا سکے۔
بیان میں کہا گیا کہ عوام ایل او سی کے متصل واقع دیہات میں قیام امن کے لئے بھارتی فوج کی کاوشوں کی سراہنا و ستائش کرتی ہے۔بیان میں مزید کہا گیا کہ بھارتی فوج کی مثبت کوششوں سے ایل او سی پر دیر پا امن قائم ہونے کا مقصد پورا ہوگا۔
دریں اثنا جموں کے بارڈر آوٹ پوسٹس پر بھی بی ایس ایف اور پاکستانی رینجرز نے مٹھائیوں کا تبادلہ کیا ہے۔بی ایس ایف کے ایک ترجمان نے بتایا: ’پاکستانی رینجرز اور بی ایس ایف نے یوم آزادی پاکستان کے موقع پر جموں فرنٹیئر کے تحت آنے والے مختلف بارڈر آوٹ پوسٹس پر مٹھائیوں کا تبادلہ کیا ہے‘۔
قبل ازیں دونوں طرف کی افواج نے 21 جولائی کو عید الاضحیٰ کے موقع پر مٹھائیوں کا تبادلہ کیا تھا۔اس دوران لوگوں نے سرحدوں پر بھارت – پاک فوجیوں کے درمیان پیدا ہونے والے بہتر تعلقات پر خوشی کا اظہار کیا ہے۔
ٹیٹوال کے رہنے والے ایک شہری نے نامہ نگاروں کو بتایا: ‘اچھی بات یہ ہے کہ نفرتوں میں کمی دیکھنے کو ملی ہے۔ بھارت اور پاکستان ایک ملک تھا۔ ہم مستقبل میں تعلقات میں مزید بہتری کے خواہاں ہیں’۔ان کا مزید کہنا تھا: ‘پہلے جب سرحد پر فائرنگ ہوتی تھی تو ہم سخت پریشان ہو جاتے تھے۔ ہمیں ہر وقت ڈر لگا رہتا تھا کہ پتہ نہیں کب گولے ہمارے گھر پر آ کر گریں گے۔ جنگ بندی معاہدے پر عمل کرنے سے ہمیں سکون نصیب ہوا ہے’۔