شمالی کشمیر میں شدید برفباری کے باوجود بھی زندگی معمول کے مطابق رہی رواں دواں

سرینگر/30 دسمبر/عاشق تلگامی

جموں و کشمیر کے اکثر وبیشتر علاقوں میں حالیہ شدید برفباری نے زندگی کے تمام شعبہ جات کو مفلوج کر کے رکھ دیا تھا۔ برفباری کے باعث اہم اور ذیلی راستے مکمل طور پر بند ہو گئے تھے، بجلی اور پانی کی سپلائی متاثر ہوئی، اور لوگوں کو سخت مشکلات کا سامنا کرنا پڑا۔ تاہم، شمالی کشمیر میں سیول انتظامیہ، جموں و کشمیر پولیس، اور دیگر محکموں کی بروقت کارروائی نے عوام کو بڑی حد تک راحت فراہم کی۔ ان کی چوکسی اور محنت کی بدولت زندگی کے معمولات جلد بحال ہوئے اور عوام نے راحت کی سانس لی
شمالی کشمیر کے مقامی لوگوں نے نمائندے سے بات کرتے ہوئے کہا کہ انتظامیہ کی کارکردگی کو سراہتے ہوئے کہا کہ جیسے ہی برفباری شروع ہوئی، محکمہ آر اینڈ بی نے فوری طور پر اہم شاہراہوں اور ذیلی سڑکوں سے برف ہٹانے کا کام شروع کر دیا۔ خاص طور پر آر اینڈ بی ڈویژن پٹن اور مشینری ڈویژن نے بروقت اقدامات کیے اور اہم راستوں کو جلد از جلد قابلِ آمدورفت بنایا، جس پر عوام نے ان کی کارکردگی کی تعریف کی۔
اسی طرح، محکمہ بجلی کے عملے نے بھی شدید سردی اور برفباری کے باوجود بجلی کی بحالی کے لیے دن رات کام کیا۔ بجلی کے کھمبے اور لائنیں شدید متاثر ہوئی تھیں، لیکن محکمہ کے اہلکاروں نے مشکل حالات میں کام کرتے ہوئے بجلی کی سپلائی کو بحال کیا، جسے عوام نے سراہا۔محکمہ پی ایچ ای (پبلک ہیلتھ انجینئرنگ) نے بھی سخت مشکلات کے باوجود پانی کی فراہمی بحال کرنے میں اہم کردار ادا کیا۔ برفباری کے باعث پانی کی پائپ لائنیں جم گئی تھیں، لیکن محکمہ کے عملے نے فوری کارروائی کر کے پانی کی فراہمی ممکن بنائی۔اس دوران، کئی گاڑیاں برف میں پھنس گئیں اور مسافروں کو مشکلات کا سامنا کرنا پڑا۔ جموں و کشمیر پولیس نے ان حالات میں اہم کردار ادا کیا۔ پولیس اہلکاروں نے برف میں پھنسے ہوئے مسافروں کو نکالنے اور گاڑیوں کو محفوظ مقامات تک پہنچانے میں مدد فراہم کی۔ ان کی خدمات کو عوام نے دل کھول کر سراہا۔برفباری کے دوران مختلف محکموں نے برف صاف کرنے اور سہولیات بحال کرنے میں اہم کردار ادا کیا۔ محکمہ آر اینڈ بی نے اہم شاہراہوں اور ذیلی راستوں سے برف ہٹانے کے لیے جدید مشینری استعمال کی، جبکہ محکمہ بیکن (BEACON) نے قومی شاہراہوں اور دور دراز علاقوں میں برف صاف کرنے کا کام کیا۔ میونسپل کمیٹیوں نے قصبوں، بازاروں، اور عوامی مقامات سے برف ہٹائی، جبکہ محکمہ مشینری ڈویژن نے جدید برف صاف کرنے والی مشینوں کا استعمال کرتے ہوئے اہم علاقوں کو قابلِ رسائی بنایا۔ اس دوران جموں و کشمیر پولیس نے ٹریفک بحال کرنے اور برف میں پھنسی گاڑیوں کو نکالنے میں مدد فراہم کی۔عوام نے انتظامیہ اور محکموں کے ملازمین کا شکریہ ادا کیا جو شدید برفباری اور سرد موسم کے باوجود اپنی ذمہ داریاں احسن طریقے سے نبھاتے رہے۔ لوگوں نے انتظامیہ سے اپیل کی کہ ایسے حالات میں مزید بہتری کے لیے جامع منصوبہ بندی کی جائے، تاکہ دور دراز علاقوں کے عوام کو بھی فوری طور پر سہولیات میسر ہو سکیں۔