پٹن بارہمولہ میں جدید "نقشہ” منصوبے کا آغاز

بارہمولہ/ 18 فروری/ عاشق تلگامی

حکومت کی جانب سے زمین کے ریکارڈ کو جدید بنانے کے تحت نیشنل جیو اسپیشل نالج بیسڈ لینڈ سروے آف اربن ہیبٹیشنز (NAKSHA) کا آغاز آج گورنمنٹ ڈگری کالج پٹن میں کیا گیا۔ یہ منصوبہ ڈیجیٹل انڈیا لینڈ ریکارڈ ماڈرنائزیشن پروگرام (DILRMP) کے تحت ایک قومی پائلٹ پروجیکٹ کا حصہ ہے، جس کا مقصد جدید جیو اسپیشل ٹیکنالوجی کے ذریعے زمین کے ریکارڈ کو زیادہ درست، شفاف اور مؤثر بنانا ہے۔

افتتاحی تقریب میں ممبر لیجسلیٹو اسمبلی (MLA) پٹن جاوید ریاض بیدار اور ڈپٹی کمشنر بارہمولہ منگا شیرپا نے شرکت کی اور منصوبے کا باضابطہ افتتاح کیا۔ جموں و کشمیر ان منتخب علاقوں میں شامل ہے جہاں یہ پائلٹ پروجیکٹ متعارف کرایا جا رہا ہے، اور پٹن سمیت چار شہری بلدیاتی اداروں (ULBs) کو اس پروگرام کے لیے چُنا گیا ہے۔

اس موقع پر خطاب کرتے ہوئے ایم ایل اے جاوید ریاض بیدار نے کہا کہ زمین کے ریکارڈ کو درست اور جدید بنانے سے شہری منصوبہ بندی میں بہتری آئے گی اور عوام کو شفافیت پر مبنی خدمات میسر ہوں گی۔

ڈپٹی کمشنر بارہمولہ منگا شیرپا نے اپنی تقریر میں کہا کہ یہ منصوبہ جدید ٹیکنالوجی کے استعمال کے ذریعے زمین کے انتظامات کو مؤثر بنانے، تنازعات کو کم کرنے اور شہری ترقی کے عمل کو تیز تر کرنے میں مدد دے گا۔

افتتاحی تقریب میں سب ڈویژنل مجسٹریٹ پٹن گلزار احمد، تحصیلدار پٹن، ایگزیکٹو آفیسر میونسپل کمیٹی پٹن سمیت دیگر اعلیٰ حکام اور مقامی افراد نے شرکت کی۔

اس موقع پر عوام میں آگاہی پیدا کرنے کے لیے انفارمیشن، ایجوکیشن اور کمیونیکیشن (IEC) مہم بھی چلائی گئی، جس میں لوگوں کو اس منصوبے کے فوائد سے آگاہ کیا گیا۔ منصوبے کا مقصد زمین کے ریکارڈ کو ڈیجیٹل بنا کر شہری ترقی میں آسانی پیدا کرنا اور حکومت و عوام کے درمیان بھروسے کو مزید مضبوط کرنا ہے۔