پالی ٹیکنک کالج کنسپورہ میں "ایک پیڑ ماں کے نام” کے تحت شجرکاری مہم کا انعقاد

بارہمولہ/ 5 دسمبر/ عاشق تلگامی

محکمہ سوشل فارسٹری کی جانب سے پالی ٹیکنک کالج کنسپورہ میں "ایک پیڑ ماں کے نام” کے تحت ایک شجرکاری مہم کا انعقاد کیا گیا۔ اس مہم کا مقصد ماحولیاتی آگاہی اور کمیونٹی کو سرسبز مستقبل کی تعمیر میں شراکت کے لیے راغب کرنا تھا۔

ڈپٹی کمشنر بارہمولہ، مینگا شرپا نے مہم کا افتتاح کیلیفورنیا کے درخت کا پودا لگا کر کیا۔ اس موقع پر ایڈیشنل ڈسٹرکٹ ڈیولپمنٹ کمشنر سید قمر سجاد، دیگر متعلقہ افسران اور طلبہ بھی موجود تھے، جنہوں نے کالج کے احاطے میں مختلف اقسام کے پودے لگائے۔
تقریب سے خطاب کرتے ہوئے ڈپٹی کمشنر نے شجرکاری کی اہمیت کو اجاگر کرتے ہوئے کہا کہ یہ موسمیاتی تبدیلیوں سے نمٹنے اور ماحولیاتی توازن برقرار رکھنے میں اہم کردار ادا کرتی ہے۔ انہوں نے محکمہ سماجی جنگلات اور کالج انتظامیہ کی مشترکہ کاوشوں کو سراہا اور نوجوان نسل کو ماحول دوست طرز عمل اپنانے کی ترغیب دی۔ انہوں نے شرکاء پر زور دیا کہ وہ یہ شجرکاری اپنے پیاروں کے نام وقف کریں تاکہ یہ ایک بامعنی اقدام بن سکے۔
شجرکاری مہم کے بعد ڈپٹی کمشنر نے کنسپورہ علاقے میں جاری مختلف ترقیاتی منصوبوں کا معائنہ کیا، جن میں پالی ٹیکنک کالج میں تعمیر ہو رہا 100 بستروں والا ہاسٹل پروجیکٹ بھی شامل ہے۔ متعلقہ انجینئر نے ڈی سی کو بتایا کہ یہ منصوبہ 715.71 لاکھ روپے کی لاگت سے تیار کیا جا رہا ہے اور جون 2025 تک مکمل ہونے کی توقع ہے۔
ڈی سی نے پروجیکٹ کو مقررہ وقت میں مکمل کرنے اور تعمیراتی معیار کو برقرار رکھنے کی تاکید کی۔ مزید برآں، انہوں نے بلاک ڈیولپمنٹ آفیسر (بی ڈی او) بارہمولہ کو ہدایت دی کہ وہ ایم جی نریگا کے تحت زمین کی ترقیاتی کاموں کے ساتھ ساتھ کنسپورہ میں نہر کی صفائی کو یقینی بنائیں تاکہ علاقے میں آبپاشی اور پانی کے وسائل کے انتظام کو بہتر بنایا جا سکے۔