جے ڈی یو صدر جی ایم شاہین کی جانب سے نوروزِ عالم کی مبارکباد

سرینگر/21 مارچ/ عاشق تلگامی

جنتا دل یونائیٹڈ (جے ڈی یو) کے جموں و کشمیر کے صدر جی ایم شاہین نے نوروزِ عالم کے بابرکت موقع پر عوام کو دلی مبارکباد پیش کی ہے۔ انہوں نے امید ظاہر کی کہ یہ مقدس دن ریاست جموں و کشمیر، لداخ اور پورے ملک کے لیے امن، خوشحالی اور بھائی چارے کا پیغام لے کر آئے۔

اپنے تہنیتی پیغام میں، شاہین نے نوروز کی روحانی و ثقافتی اہمیت پر روشنی ڈالتے ہوئے کہا کہ یہ دن تجدیدِ عہد، امید اور خوشحالی کی علامت ہے، جو ہمیں مثبت طرزِ فکر اپنانے اور بہتر مستقبل کے لیے کوشاں رہنے کا درس دیتا ہے۔ انہوں نے مزید کہا کہ کشمیر کی شاندار تہذیب میں نوروز ایک اہم مقام رکھتا ہے اور صدیوں سے اس خطے کے لوگ اسے جوش و خروش اور عقیدت کے ساتھ مناتے آئے ہیں۔

جی ایم شاہین نے زور دے کر کہا کہ نوروز نہ صرف فطرت کی تازگی کا پیغام دیتا ہے بلکہ سماجی یکجہتی اور بھائی چارے کو بھی فروغ دیتا ہے۔ انہوں نے عوام سے اپیل کی کہ وہ اس موقع پر محبت، ہمدردی اور یکجہتی کو مضبوط کریں اور آپسی بھائی چارے کو مزید فروغ دیں تاکہ ریاست میں امن اور ہم آہنگی کو تقویت ملے۔

آخر میں، انہوں نے دعا کی کہ یہ نوروز ہر گھرانے کے لیے مسرت، ترقی اور امن کا پیغام لے کر آئے اور جموں و کشمیر سمیت پورے ملک میں خوشحالی کا سبب بنے۔