پونچھ میں غیر معیاری کھانے کی اشیاء کی فروخت جاری: فوڈ سیفٹی ڈیپارٹمنٹ کی ناکامی پر عوام برہم

پونچھ/29 مارچ/ماجد چوہدری

پونچھ میں فوڈ سیفٹی ڈیپارٹمنٹ کی جانب سے حالیہ معائنے کے باوجود بازار میں غیر معیاری اور غیر محفوظ کھانے کی فروخت بدستور جاری ہے۔ عوام نے اس صورتحال پر شدید تشویش کا اظہار کرتے ہوئے فوڈ سیفٹی ٹیم کی کارکردگی پر سوالات اٹھائے ہیں۔ ان کا کہنا ہے کہ یہ معائنہ محض عید اور نوراتری جیسے تہواروں سے قبل ایک رسمی کارروائی تھی، جس کا کوئی عملی اثر دکھائی نہیں دے رہا۔

اس رپورٹر کے جانب سے معائنے کے بعد کیے گئے فالو اپ دورے میں کئی دکانداروں کو کھلے عام کٹے ہوئے پھل، سبزیاں اور دیگر کھانے کی اشیاء فروخت کرتے ہوئے پایا گیا۔ ان اشیاء پر مکھیوں، مچھروں اور بھنبھیریوں کے جھنڈ منڈلا رہے تھے، جس سے کھانے کے آلودہ ہونے کے واضح خطرات لاحق تھے۔ افسوسناک بات یہ رہی کہ بیشتر دکاندار بغیر دستانے پہنے کھانے کی اشیاء کو ہاتھ لگا رہے تھے، جو فوڈ سیفٹی پروٹوکول کی کھلی خلاف ورزی ہے۔

عوام نے فوڈ سیفٹی ڈیپارٹمنٹ کی لاپرواہی پر برہمی کا اظہار کرتے ہوئے کہا کہ محکمہ صرف تہواروں کے موقع پر یا شکایات پر ہی حرکت میں آتا ہے، جبکہ روزمرہ کی بنیاد پر نگرانی بالکل غائب ہے۔ مقامی شہریوں کا کہنا تھا کہ سطحی معائنوں سے دکانداروں کو غیر معیاری کھانے فروخت کرنے کی کھلی چھوٹ مل رہی ہے، جو عوامی صحت کے لیے سنگین خطرہ ہے۔

فوڈ سیفٹی اینڈ اسٹینڈرڈ اتھارٹی آف انڈیا (FSSAI) کے ضوابط کے مطابق کھلے عام کٹے ہوئے پھل اور دیگر غذائی اشیاء کی فروخت پر سختی سے پابندی عائد ہے، کیونکہ یہ اشیاء بیکٹیریا اور دیگر آلودگیوں کا شکار ہو سکتی ہیں۔ فوڈ سیفٹی اینڈ اسٹینڈرڈ (لائسنسنگ اینڈ رجسٹریشن آف فوڈ بزنس) ریگولیشن 2011 کے تحت کھانے کو سنبھالتے وقت دستانے، کیپ اور صاف برتنوں کا استعمال لازمی قرار دیا گیا ہے۔ تاہم، فوڈ سیفٹی ڈیپارٹمنٹ کی جانب سے ان ضوابط پر عمل درآمد نہ کروانے پر سوالات اٹھ رہے ہیں۔

عوام نے مطالبہ کیا ہے کہ اسسٹنٹ کمشنر فوڈ سیفٹی پونچھ بازار میں باقاعدہ اور سنجیدہ معائنے کو یقینی بنائیں اور صفائی ستھرائی کے اصولوں کی خلاف ورزی کرنے والے دکانداروں کے خلاف سخت کارروائی کی جائے۔

عید اور نوراتری جیسے بڑے تہواروں کے پیش نظر عوام نے ضلعی انتظامیہ سے اپیل کی ہے کہ وہ فوڈ سیفٹی ڈیپارٹمنٹ کو جوابدہ بنائے اور کھانے پینے کی اشیاء کی مناسب نگرانی کو یقینی بنائے، تاکہ شہری غیر معیاری اور غیر محفوظ کھانے کے خطرات سے محفوظ رہ سکیں۔